కుల గర్జన కాదు కుల గజ్జి ఇది
కలి కాలము కాదు కుల కాలము ఇది

కళకు కొలతలు లేవు
కళకు అవధులు లేవు
ఒకరి కోసము కాదిది
ఇంకొకరి  కోరిక కాదిది
ప్రకృతి రంగులలో ఒకటిది
నీ ప్రకృతి అదే కళైనది
పాట ఆట మాట మౌనం
నిన్ను  నీలా చూపేది
నీకు నిన్ను చూపించేది
కళ అది

    - అహం బ్రహ్మాస్మి

ఎన్నాళ్లని రా ఈ బలులు
మేలుకోరా ఇక చాలు
నా దేశం నా దేశం అంటావు
నా దేశం కానిది లోకం కాదా
నా దేశంలో లేనివారు మనుషులు కారా
దేశానికి దేశానికి అడ్డు మనుషులే రా
దేశానికి దేశానికి అడ్డు ఆ  మనిషిలో అహమేరా
రంగు వేరు రూపు వేరు
పేరు వేరు పలుకు వేరు
మనిషి మాత్రం ఒకటే రా
మనిషి అసలు స్వరూపం ప్రేమే రా
నమ్మి చూడు ప్రెమించి చూడు
అప్పుడు హద్దులు లేని ఒక దేశం అవతరిస్తుంది చూడు

- అహం బ్రహ్మాస్మి

ప్రేమించిన పని చెయ్యాలా
చేసే పనిని ప్రేమించాలా
ప్రేమించి పెళ్లి చేసుకోవాలా
పెళ్లి చేసుకొని ప్రేమించాలా

ఏమో తెలియదు నాకు
ఏది అసలైన దిక్కు

అసలు ప్రేమకు అది ఇది ఏమిటి
అసలు ప్రేమకు ఆడ మగ ఎమిటి
అసలు ప్రేమకు , పెళ్ళికి సంబంధం ఎమిటి
హద్దులు లేనిది కాదా
అడ్డులు తెలియనిది కాదా

- అహం బ్రహ్మాస్మి 

నాలా బ్రతకాలంటే నేనై పుట్టాలి
నన్నే గెలవాలంటే నేనై ఆడాలి
నా బ్రతుకు పుస్తకానికి నేనే అన్నీ
నా జీవిత రహదారిలో నేనే ఒక ఒంటరిని
వేరు వాడి వైపు చూడకు రా చూడకు
వాడి పరుగు వాడిదే నీ నడక నీదే

- అహం బ్రహ్మాస్మి 

ఒక్కడినే నేనొక్కడినే నేనే వాడిని ఒక్కడినే
రాతిని కొట్టి రూపము చెక్కి రంగులు పూసే వస్తున్నా
వస్తూ వస్తూ చూసా శిల్పము చాలా ఉంది నాలాగ
రూపము నేనే రంగూ నేనే ఎత్తూ బరువు అన్నీ నేనే
ఇంకో నాలుగు అడుగులు వేసా మళ్ళీ చూసా శిల్పమునే
ఏడుస్తుంది నన్నే చూసి నేను విరగ్గొట్టిన తన రాతిని చూసి
విప్పలేని నోటితో కార్చలేని కన్నీటితో ఆర్తితో అడిగింది
ఎందుకు ఈ స్వార్ధమని

-అహం బ్రహ్మాస్మి

ఏదో కావాలని ఆశపడకు
ఏదీ రాలేదని బాధపడకు
ఎంత వచ్చినా వదలననకు
ఏది ఇచ్చినా నాది అనకు

-అహం బ్రహ్మాస్మి 

వస్తున్నా వస్తున్నా యుగపురుషుడను నేను ..

చీకటి రాజ్యపు కోటలు దాటి
కాలపు కాటుక మనసున చెరిపి
వజ్రపు వెలుగుల నేటి లోకంలోకి
ముళ్లను ఓడలుతో నవ్వుతు ఢీకొని
మెత్తని పూవుల  సొగసుని పొగిడి
చేతులలో ఆయుధమే లేదు
గుండె నిండా ఆనందం తప్ప ..

వస్తున్నా  వస్తున్నా యుగపురుషుడను నేను ..


-అహం బ్రహ్మాస్మి

చీకటి బ్రతుకులు మావి చిన్న దీపము కూడా లేదు
ఈ మాయా లొకంలో.. మసకబారిన చూపుతో
ఎటు పొయేది ఎలా పొయేది
అందరిది ఇదే గతి .. మైకం లో ఉన్న మతి
రారా చిన్నన్నా చేయి పట్టి నడుద్దాం
కలసి కదిలి మనస్తత్వాన్ని ఎరుగుదాం ..

- అహం బ్రహ్మాస్మి 

మేకప్ మొకాలు లిప్స్టిక్ పెదాలు
ఎంతో మేలు ఎంతో మేలు
ముసుగుల బతుకుల కపటము కన్నా
ఎంతో మేలు ఎంతో మేలు
విషయము దాచు మనిషి కన్నా
విషము ఉన్న పాము మిన్న
ఇలా ఎన్ని పద్యాలు రాసుకున్నా
ఫలితము మాత్రం నిండు సున్నా ..

                                   - అహం బ్రహ్మాస్మి 

మాసిన గెడ్డం , అరిగిన చెప్పులు
చిరిగిన చొక్కా , నలిగిన లుంగీ
నాలుగు రోజులు తిండే లేదు
ఐదవ రోజుకి  ఆకలి లేదు
కడుపు మండే  , మోకాలు వణికే
నోరు ఎండే , కళ్లు తిరిగే

కడుపు నింపగా దేవుడు రాడు
నిస్సహాయ స్థితిలో మనిషి వీడు ..

-అహం బ్రహ్మాస్మి

నను చూడని నీ కనులు నా కలలను శాసిస్తుంటే

నిను చూసిన నా కలలు నన్నే మరపిస్తుంటే

ఆ వర్షము ఊరించెనే
మనము తడవని చినుకులు ఇవిగో  అని

ఈ ఎండలు ఏడిపించెనే
తోడు నీడగా నీవు లేవని

ఇక చాలు ఈ దూరము ..
నిజమవ్వాలి మన ప్రేమము ..

- అహం బ్రాహ్మాస్మి 

ఓ మనసా నా మనసా

విరామం నీకు తెలుసా
ఎందుకే చేస్తావు నానా రభస

నా మాటలు నీకు అలుసా
నిన్ను అర్థం చేసుకోలేదేమో నేను  బహుశా

ఓ మనసా నా మనసా

-అహం బ్రహ్మస్మి

నడుస్తా నడుస్తా నడుస్తూనె ఉంటా
రాళ్లున్నా నీళ్లున్నా నడుస్తూనె ఉంటా
దుమ్ము పట్టిన కాళ్ళని చూడు గర్వంగా చెప్తాయ్
నేను పట్టిన పట్టు వెనక కధలన్నిటిని

కాయ కాసిన పాదాలనడుగు బిగ్గరగా చెప్తాయ్
నేను పడ్డ కష్టాన్ని ..నేను చూసిన సుఖాన్ని
నడుస్తా నడుస్తా నడుస్తూనె ఉంటా
అలలున్నా వలలున్నా నడుస్తూనె ఉంటా
బ్రతుకు బాటసారిని నేను నడుస్తూనె ఉంటా
                                                                      - అహం బ్రాహ్మాస్మి

ఆపేసాను ఆపేసాను నా కళ్ళల్లో నీళ్ళని
గట్టిగా ఊపిరి తీసుకొని ఆపేసాను
నా కన్నీళ్ళన్నిటిని

గుండెల్లో బరువుని ఉండని ఉండని
కళ్ళల్లో తడిని అలానే నిండని
అప్పుడే ప్రేమకు ప్రాణం ఉంటుంది
అప్పుడే బాధకు అర్ధం ఉంటుంది
వెళ్ళిపో నన్ను విడిచి నన్నే కాదని
అయినా ఉంటాను నిన్నే తలచుకుని...నిన్నే తలచుకుని..

ఆస్తికుడిని  కాదు నాస్తికుడిని కాదు
నేను నేనే నేను నేనే
నాయకుడిని కాదు సైనికుడిని కాదు
నేను నేనే నేను నేనే
మంచివాడిని కాదు చెడ్డవాడిని కాదు
నేను నేనే నేను నేనే

నన్ను నేనుగా చూడు .. నన్ను నేరుగా చూడు
అప్పుడే తెలుస్తుంది నేను ఎవరిననేది ..నేను  నేనే  నేను నేనే ..

                    - అహం బ్రహ్మాస్మి

నిలదియ్యరా నిన్ను  నిలదియ్యరా
నిన్ను నువ్వే ప్రశ్నించి నిలదియ్యరా
చూసీ చూడనట్టు నిన్ను చూడకురా
ధైర్యంగా నిలబెట్టి నిన్ను నిలదియ్యరా
అప్పుడే ఆగుతుంది ఈ అంతర్యుద్ధం
అప్పుడే ముగుస్తుంది ఆ బాహ్య యుద్ధం    ..ఇది తధ్యం

                                                 - అహం బ్రాహ్మాస్మి 

ఆపెయ్  ఆపెయ్ పరుగులు ఆపెయ్
చక్కగ  నించొని చూడర  ఆపై

అపుడో  ఎపుడో కాదుర జీవితం
నేడే నేడే  నిజముర ఇది నిజం

రేపటి భయమే నేటికి సమాధి
అరెరె మరువకు అదే గతి రేపటిది

                        -అహం బ్రహ్మాస్మి 

గీసాం గీసాం గీతలు గీసాం
నీది నాది అని రాతలు రాసాం
ఏది ఏది ఆ నీది ఏది
అందరికీ కానిది ఎందుకు ఆ నీది
మానవత్వానికి హద్దులు లేవే
ప్రేమ తత్వానికి అడ్డులు లేవే
చెరిపేయ్ చేరిపేయ్ ఈ గీతలు చెరిపేయ్
కనిపించని సంకెళ్లను నీ కళ్ళు తెరిచి తెంపేయ్

                               -అహం బ్రహ్మాస్మి 

ఏదో ఉన్నాం ఏదో పోయాం
చూస్తాం చూస్తాం చూస్తూ చస్తాం
కదిలించని చూపు ఎందుకు చెప్పు
కదలిరాని చేయి అది రాయి

సోదరా సోదరా శోధించరా
అక్కడా ఇక్కడా అది నువ్వేరా

స్వార్ధమై పోకు రా ఓ సోదరా
ధైర్యమై సాగరా నువ్వు మనిషిరా

                      - అహం బ్రహ్మాస్మి